Vlag van Frankryk

Vlag van Frankryk

Bynaam	(fr) Tricolore
Gebruik	Nasionale vlag
Verhouding	2:3 (algemeen)
Goedgekeur	15 Februarie 1794 5 Maart 1848
Ontwerp	vertikale driekleur in blou, wit en rooi van ewe breedte
Ontwerp deur	Lafayette, Jacques-Louis David
Gebruik	Nasionale vlag
Verhouding	2:3 (algemeen)
Goedgekeur	15 Februarie 1794 5 Maart 1848
Ontwerp	soos bo, maar met donker kleure
Gebruik	Nasionale vaandel
Verhouding	2:3
Goedgekeur	17 Mei 1853 (voorheen dieselfde as die nasionale vlag) gebruik in die donker weergawe[1]
Ontwerp	soos bo, maar met die verhouding 30:33:37

Die nasionale vlag van Frankryk is op 15 Februarie 1794 vir die eerste keer amptelik aanvaar (met ’n ligter weergawe wat sedert Junie 1976^[1] ook in gebruik is). Die vlag vertoon drie ewe wye vertikale bane in blou, wit en rooi.^[2] Die vlag se verhouding is “2:3” (twee in hoogte, drie in lengte). Die Franse driekleur (Frans: tricolore) is een van die invloedrykste vlae in die geskiedenis met die driekleurskema wat deur talle ander volkere in Europa en die res van die wêreld aangeneem is, en, volgens die Encyclopædia Britannica, het dit histories “in simboliese teenstand teen die outokratiese en kerklike koninklike standaarde van die verlede” gestaan.

Die koninklike regering het verskeie vlae gebruik, waarvan die bekendste ’n blou skild en goud fleurs-de-lis (die koninklike wapen van Frankryk) op ’n wit agtergrond is. Aan die begin van die Franse Rewolusie het die Paryse milisie, wat ’n sentrale rol in die bestorming van die Bastille gespeel het, ’n kokarde in blou en rooi gedra,^[3] dié stad se tradisionele kleure. Volgens die Franse generaal Lafayette was wit die “antieke Franse kleur” en is by die militêre kokarde gevoeg om ’n driekleur (’n Franse nasionale kokarde) te skep.^[4]

Dié kokarde het deel geword van die Nasionale Garde se uniforms wat die milisie vervang het en onder bevel van Lafayette was.^[5] Die Franse kokarde se kleure en ontwerp vorm die grondslag vir die Franse vlag wat in 1790 aanvaar is.^[6] Die enigste verskil is dat die vlag van 1790 se kleure omgekeerd was. Die vlootvaandel – volgens ’n legende op versoek van die Konvensie deur Jacques-Louis David (1748–1825) geteken – is op 27 Pluviôse in die Jaar II, dus 15 Februarie 1794, goedgekeur,^[7] maar die oorsprong daarvan is ouer en gaan terug na die drie kleure van vryheid (op 14 Julie 1789), identies aan die drie kleure van die Amerikaanse Rewolusie en die vlag van die Verenigde State, blou en rooi is ontleen aan die kleure van die stad Parys en dié van die Paryse Nasionale Garde, kleure wat die wit van koninklikes sou omring, en dus identies aan die drie kleure wat deur die verskillende Franse vlae van die Ancien Régime gebruik is. Die driekleurvlag is sedert 1794 die amptelike vlootvaandel van Frankryk en sedert 1812 die amptelike vlag van die leërs, met uitsondering van die monargiese herstelperiodes van 1814–1815 en 1815–1830. Sedert 1830 (met uitsondering van enkele dae tydens die Franse Rewolusie in 1848) is dit deurlopend die vlag van Frankryk en word in artikel 2 van die Franse Grondwet uit 1958 genoem.

1. ↑ ^{1,0 1,1} (fr) "Drapeau Français". promo-drapeaux.fr. Geargiveer vanaf die oorspronklike op 1 Februarie 2019. Besoek op 31 Januarie 2019.
2. ↑ (fr) "Dimension des bandes du drapeau tricolore". Franse Senaat. Besoek op 11 Julie 2021.
3. ↑ (it) "Presa della Bastiglia, il 14 luglio e il rosso della first lady messicana Angelica". Besoek op 9 Maart 2017.
4. ↑ (en) Marie Joseph Paul Yves Roch Gilbert Du Motier Lafayette (marquis de), Memoirs, correspondence and manuscripts of General Lafayette, vol. 2, bl. 252.
5. ↑ (en) James Gaines (September 2015). "Washington & Lafayette". Smithsonian Magazine. Besoek op 11 Julie 2021.
6. ↑ (it) "La storia del tricolore". Besoek op 5 Oktober 2019.
7. ↑ (fr) "Pourquoi le drapeau français est-il bleu, blanc, rouge ?". Francesoir.fr. 13 April 2015. Besoek op 11 Julie 2021.